Urkunde 1349 Mai 1

Graf Engelbert von der Mark verkauft am 1. Mai 1349 aus dem Reichshof Brakel eine Erbrente von 8 Mark mit Wiederkaufsrecht während 10 Jahren. Käufer ist Johann Sudermann aus Dortmund.

Wortlaut

Die Urkunde ist in mittelniederdeutscher Sprache verfasst und hat folgenden Wortlaut:

Wy greve Enghelbert van der Marke don kunt aldenghene, de dussen breyf zeyt unde horet lesen, dat wi mit vulbort unde mit guden willen al unser rechten erven hebbet vercoift Johanne Sudermane unde sinen rechten erven erflike 8 margh gheldes enen olden koninghes tornoys vor 4 penninghe ofte sin wert ut unseme hove to Brakele, den wi van dem rike holden, unde ut al siner tobehoringhe als dey geleghen ys, dey wy ofte unse ametman, de to der tit ametmen is over den hof, oft de schultete de den hof besit van unser weghene dem vorgenomeden Johanne und sinen erven iarlikes to Dorpmunde in de stet betalen sal des negsten daghes sunte Mertines daghe vor ene summe gheldes, de uns wol betalet ys; unde were dat he eder de sine op de tit nicht betalet ene werden, so moghen se bin enen mande darna mit deme gherichte van Dormpmunde panden ut deme selven hove unde ut al siner tobeheringhe sunder ovele moyt van uns eder hindernusse und sunder vervolginghe enighes rechtes, unde dat pant mit deme selven gerichte vorcopen vor en vorvolghet pant bit an de tit, dat he unde de sine de vorbenomeden gulde dighere ende overal opgebort hebben, mer Hake van Herne de sal to vorn dar ut hebben und born 25 margh de tit als de breyve holden, de wi eme vor dur tit ghegheven hebben, mer sinen iaren geleden, so solen alle iar de 8 margh de eyrste gulde sin , de men dar ut betalen sal. Vortmer so hevet Johan vorgheseghet uns unde unse rechten erven dey genade gedan, dat wi binnen 10 iare nest comende moghen iarlikes op sunte Peters dagh ad kathedram dusse vorgenomeden gulde weder copen vor 80 margh penninghe, enen olden koninghes tornoys vor 4 peninghe getalt, oft sin wert, mer ene cofte wi durser vorsegeden gulde binnen dussen vorsproken 10 iaren nicht weder, so sal Johan unde sine erve de 8 margh geldes erflike in den hof unde al sine tobehoringhe beholden unde des sal Johan unde sine erven unse man dar van werden und des sun wi unde unse erven den vorsegheden Johanne unde sine erven unde al sine nakomelinghe also dicke als en des noyt ys unde se it uns esschen darmede belenen, it si vrowe eder man an mans stat, sunder enigh gevende gut, unde to ener merre sekernusse al desser vorbenomeder stucke so hebbe wi en borghen gesat, de hir na gescriven stat hern Diderike van deme Varste, Hermanne van Pentlingh, Johanne v.an Berghem, ryttere, Wilhamme Dobben, Diderike van Wivinchusen, Diderike Nartkerken unde Rotghere van Glatbeke, knapen, de vor uns sekert und gelovet hebbet an guden truwen unde mit samender hant al dusse vorbenomenden stucke stede und vast to holdenne, unde wi borghen vorgescrevenen sekern unde loven an guden truwen unde mit samender hant, dat wat ghebrekes eder hindernusse dat Johan eder sine erven binnen dussen 10 iaren des wedercopes hedden van arre gulde op de vorsegeden tyt eder an der lenwere na den 10 iaren also verre als de wedercop binnen dussen 10 iaren nicht ensche unde wi unde unse borghen dar ume ghemant worden, so sun wi unde unse borghen to Dormpmunde in komen in ene gemeyne herberghe oft unser itlich sal enen guden knecht vor sich senden mit enen perde unde nicht van dane scheden deme vorsegheden Johanne und sinen erven en si genogh gescheyn van al den stucken vorgenomet, ock so verwillecore wi uns borghen vorgeseghet, dat wi unser unser lofnusse unde sekerheyt nicht quit wesen en sunen de wi hebben gedan in dussen breyve, bit an de tit, dat Johan eder sine erven sin belenet mit dusser vorsegeder gulde also verre als de wedercop nicht en schut binnen dussen 10 iaren, mer wanner Johann unde sine erven eder sine nakomelinge sint van uns unde unsen erven eder nakomlinghen belenet unde betalet van arre gulde unde van alleme gebreke, dat binnen 10 iaren des wedercopes gevallen ys, so sun unse borghen arre lofnusse quit sin, unde dan so love wi vor üns unde unse erven unde al unse nakomelinghe in guden truwen al desse vorscrevenen stucke, als de breyf inne heldet Johann unde sinen erven stede unde vast truwelike unde wol to holdene sunder eingerlege argelist. Och wer dat unser borghen enigh aflivich worde, so sun wi hinnen vertennachten enen anderen likegut wedersetten an sine stat unde were dat des nicht ensche, so sulen wi unde unse borghen to Dorpmunde in komen eder unser iuwelich enen guden knecht mit enen perde vor sich senden als to voren gescreyen steyt unde ume dat al dusse dingh stede unde vast sin unde bliven, so hebbe wi greve Enghelbert van der Marke vor uns unde unse erven van al unse nakomelinghe unde mit gaders al unser borghen dussen breyf besegelet mit unsern ingesegele, unde wi borghen vorgescrevene bekennen, dat wi op dat al dusse stucke stede unde vast sin unde bliven unse ingheseghel an dussen breyf hebbet ghehanghen. Gegheven unde gheschein na iaren unses herren 1349 op sunte Walburghe dagh.

Bemerkungen

Der in der Urkunde erwähnte Amtmann Hake von Herne dürfte mit großer Sicherheit Randolf Hake sein.

Siehe auch

• Portal:Urkunden