Urkunde 1426
Johann von Volmarstein verschreibt im Jahr 1426 seiner Frau Elisabeth eine Leibzucht: das Haus Drensteinfurt mit all seinem Zubehör, verschiedenes aus den Höfen Bockhorst und Heessen.
Wortlaut
Die Urkunde ist in mittelniederdeutscher Sprache verfasst. Ihr Wortlaut wird nach Kindlinger zitiert: [1]
Ich Johann van Volmestene enkenne in dussen openen Breve und betuge, dat ich vor my und vor al myn rechten Erven und Anerven betuchtighet hebbe Lysabet van Wysch, myn eliken Husvrowen, und to rechten Lyfftucht ghegeven und gemaket to eren Lyve, dat Hus und Woninghe to Stenvorde up dem Dreyne myt al syner Togelegenincheit und Tobehoringe, Molen und Vischerie, und mit al syme Rechte, und mit dem vrien Wibbolde, und Veste, und dat Gherichte tho Stenvorde, und al des Wibboldes und Gherchtes Rechte an allen Renten und Vorvallen, als dat in den vrien veyr Pelen belegen ys und eyn Dorslaehtich Eghen ys. Und hebbe se vort betuchteget myt dem Hove to Bockhorst eynen Ampthof, myt syn Tobehoringe eyn Dostachtich Eghen, und myt des Hoves Rechte, und den Guden und Luden, de in dat Recht horet, als Albertes Gut to Panewick, Vrochten Gud und de Schokenhove to Panewick, Eysmans Gud to Stenvorde, Godeken Gud to Borbenne, Bakenkoten to Buren, de Kote tor Eyck, to Langenhovele, Rosendales Koten to Northolte, Robeken Kotsteden to Osterk, das Gut to Almelinck, dar bi Diderikes Koten. Und vort betuchtiget myt eynlucken Guden in dem Ampte to Stenvorde, myt Bomgarden Gude to Stenvorde, Hannesgude to Pannewick, Botermansgud to Cleyhorst, Wildermansgud und Goddengud to Bockhorst, den Molenkotten to Ekinctorpe, dat Poppinckrot, und des Meyesgud to Northolte, und vyff Kotstede, de dar in horet, und den Koten an dem Dornekamp , un den Kamp, myt al desser eynlucken Gude. Tobehoringe Dorslachtich egen, und den Luden de dar to horet. Und vort myt dem Teynden, de gheyt over den Hoff to Vosdingen, over Weldermansgud, over Botermansgud, over das Velthus bi der Wisch. Vortmer hebbe ik se betuchtighet myt dem Ampthove to Stenvorde op dem Drene myt syner Tobehoringe und Hoves Rechte, Renthen und Voeweden Rechte, und myt den Luden und Guden, de in dat Hoves Rechte horet, als de Hoff to Aversdunck, de Stenhove, Middendorpes Hove, dat Nevengud, den Koten gheheten de Calchove to Aversdunck, twe Gut to luttiken Aversdunck, dat Gud to Levelinck to Rypenselen, dat Bruggegud to Stenvorde, twe Gud to Cleyhorst, eyn Gud to Elkinctorpe, dat Velthus, Hovemansgud to Grentorpe, Ryvengud to Panewick, de Suthof to Stenvorde, Hoyemansgud, de Spelinchove, dat Gud to Gorte, twe Gud to Wersebrockhusen, dat Gud to Botinctorpe, dat Suderhus to Bracht myt eren Tobehoringen, als se ok myt dem Hove betuchtiget ys van dem Heren, dar der van tho Lene gheyt. Vortmer myt dem Hove thon Loe und Hinsengude dar by, und den Luden und eren Tobehoringen. Vortmer hebbe ich se betuchtiget myt Willen des Lenheren Johannes van Ghemen, dar de Voghedie van to Lene gheyt, als de gheyt over den Hoff to Vosdinghen, und to Ostorpe, und over de Gude de in de Vogedie horet, dat Osthuis to Averdunck, Yerwegesgud to Ekinctorpe, Hinkengud to Buren, dat Gud to Amyck, dat Gud to Acwyck, myt al der Vogedie Rechte, dar inne nicht utgescheden, dan des Gestchtes Recht to Vreden; und hebbe ghebeden Johanne van Ghemen dussen Breyf mede to besegelen. Und ik Johan van Ghemen hebbe Lysabet myn Suster eyn Lyfftucht der Vogedie belenet, und hebbe dar up myn Ingesegell mede don han an dussen Breyff. Vortmer hebbe ik se betuchtiget myt dem Ampte to Hesne, ok myt dem Huse und Woninge tho Hesne, myt al syme Rechte to hebbene, to besyttene myt Vischerie, und in aller slachterNut, und darinne nicht utgescheden, eyn dorslachtich Egen. Und vort myt dem Hove tho Hesne und siner Tobehoringe und den Gherichte und vryen Byvange to Hesne, und myt al des Hoves und Gherichtes Rechte und Voewede, und alle den Luden, Hoven und Koten, de in des Hoves Recht horet, als bi Namen dreyg Gude to Suthesne, Kerkdorpesgud, dat Gud up der Beke, dat Kersenbrock, und vort al de Koten und Koetstede, als de belegen sint in dem Dorpe tho Hesne, und to Broke, und to Rumpenhorst, und ar ok mede belent is van dem Lenheren dar de Hof van to Lene gheyt. Und hebbe se vort betuchtiget myt al den egenen Guden in dem Ampte to Hesne, myt Winoldesgute to Broke, myt Westhovenkoten, myt dem Gude to Wetinchusen, myt dem Gude to Vrilewick, und den Luden und Tobehoringen. Vortmer hebbe ik se betuchtiget in dem Amte to Bokem, myt dem Kemennadinchove to Bokem, und al den Koten, de to Bokem in dem Dorpe ligget, und in den Hoff horet, and myt Bleckmanshove thon Twenhoven, und den Hulskotten myt Luden und Tobehoringen und Teynden und Voeweyden in dem Kerspel to Werne; und myt des Husmansgude to Holthusen, und dem Berenhove, und Hermansgude und Kutenkoten to Dalbokem myt den Luden und Tobehoringen, dorslachtich Egen. Und ik Johan van Volmsten und myn Erven solet Lysabet vorg. in allen Puncten dessen vorg. Lyfftucht und Wedeme beholden sunder Argelist, und Lysabete dusser vorg. Lyfftucht waren und rechte Warscop don, als Lyfftucht Warscop Recht is. Dar up so hebbe ik Johan van Volmsten Lysabet myn eliken Husvrowen vorg. in de Lyfftucht ghesat, und bestedeget myt Gherichte und myt Rechte vor mynen vrien Greven in den sittenden Gherichte, und den vrien Greven esschet dessen Breyff mede besegelen. Und hebbe dar up to Kuntschap und to Tuge der Warheyt myn Ingesegel vor my und vor myn Erven don han an dussen Breyff. Ock ys Vorwaringe in dusser Lyfftucht ghedan, off ik Johan van Volmsten welick Stucke Erves ute dusser Lyfftucht vorkopen moste off versetten, off in ene Memorien ewiger Seylegedechte makede, dar sel er dusse Lyfftucht tegen jemand unvorbroken mede wesen. Uff al dusse vorg. Puncte und Lyfftucht enkenne ik Johan van Essene Vriegreve, dat de al vor my in den sittenden Gherichte gescheyn sin, dar ik Stede und Stol geescheder Vrien besad und besetten hadde, und Juncvrouwe Lysabet in dusse Lyfftucht is ghesat myt Ordelen und myt Rechte, dar ik myn Orkunde up entfenck Antworde vele guder Lude, und Stantnoten des Gherichts up gaff; Corde den Ketelere, Amptman in der Tyt thom Hamme, Bernd van Monster Hinrikes Sone, Lamberte van Herborne, Hinric van Galen, und den vrien Vronen Everde Nottebom, Johanne to Verkinck, Hermanne to Willinck, Jacob to Barkhusen. Dar up hebbe ik Johan van Essene Vriggreve vorg. myn Segel vor dat sittende Gerichte mede ghehangen an dussen Breyff to Tuge der Warheyt. Ghegeven na der Ghebord Godes, do men screyff Dusent veyrhundert und ses und twintich Jar.
Literatur
- Niklas Kindlinger: Geschichte der Familie und Herrschaft von Volmestein - ein Beytrag zur Geschichte des Bauern- und Lehnwesens, und der Staatsverfassung. Welcher die Urkunden enthält. Osnabrück 1801.
Standort
LWL-Archivamt für Westfalen, Münster [2]