Urkunde 1378 November 4
Godeke von Binkhof verkauft am 4. November 1378 vor dem Richter Johann von dem Berge zu Hamm an Dietrich von der Recke eine jährliche Geldrente aus seinem Gut zum Binkhof.
Wortlaut
Die Urkunde ist in mittelniederdeutscher Sprache verfasst. Ihr Wortlaut wird nach Merx zitiert: [1]
Ich Godeke van den Byynchove, Peternelle min echte husvrowe, Johan, Lubberd, Kunne unde Peternelle unse echte kindere unde vartmer al unse rechten erven enkennet openbare in dussen breyve, dat wi hebt vorcoft rechtliken unde redeliken erfliken to bezittene Thiderike van der Reke unde synen rechten erven veyr marc geldes, as to Unna ofte to Camen genge unde geve is, ute unsen alingen gude ton Byynchove, alzo dat gelegen is mit al siner tobehoringe; unde hebt en dei gegeven ume eyne summen geldes, dei uns wol unde al betalt is. Ande wi unde unse rechten erven solen Thiderike vorgenomd unde sinen rechten erven dei vorgenomden veyr marc geldes geven ande betalen alle jar op sunte Mertynsdach in den wintere, er dan anders jenegerleye gulde ofte gued darut gehaven ofte geboerd werde; en dede wi des nicht oppe den vorscrevenen dach, so solde wi dei vorgenomden veyr marc geldes en dryspidel betalen. Vartmer si wi gekomen vor Johanne van den Berghe richter ton Hamme in der tyt unde hebt der veyr marc geldes utgegaen unde vortegen, alzo recht in. Al dusse vorgescrevenen rede hebbe ich Godeke vorgenomd vor mi unde vor al mine rechten erven loved unde sikerd, in guden truwen Thiderike vorgenomd unde sinen rechten erven stede unde vast to haldene sunder argelist; unde hebbe des to tughe der warheid min ingezegel an dussen breif gehangen. Unde ich Johan richter vorgenomd enkenne, dat Godeke, sin echte husvrowe, er kindere vorgenomd dusser vorgenomde veyr mark hebt vortegen, unde sind der alinch utgegaen vor dem hegeden gerichte, dar ich stat und stoel bezeten hadde unde ordel unde recht over gevunden unde gewist ward, alzo recht is. Dar over unde an waren richteslude gekorn an beident siden Conrad van der Reke, Goswin van Velmede, Gerd Copman unde guder lude genoch. Des to tughe so hebbe ich Johan richter vorgenomd min ingezegel mit Godeken vorgenomd an dussen breif gehangen. Datum anno domini M°CCC°LXXVIII° feria quinta ante festum Martini episcopi.
Literatur
- Otto Merx: Urkundenbuch des Clarissenklosters, späteren Damenstifts Clarenberg bei Hörde. Dortmund 1908
Anmerkungen
- ↑ Otto Merx: Urkundenbuch des Clarissenklosters, späteren Damenstifts Clarenberg bei Hörde. Dortmund 1908.