Urkunde 1323 November 13

Die Grafen Adolf von Berg und Heinrich von Waldeck vermitteln unter dem Datum des 13. Novembers 1323 einen Friedensvertag zwischen dem Bischof Ludwig von Münster und dem Grafen Engelbert von der Mark.

Wortlaut

Die Urkunde ist in niederdeutscher Sprache verfasst und wird nach Bockhorst/Niklowitz zitiert:

Wi, Alf van den Berghe und Hinrich van Woltegke, greven, soonlude gekorn in deme kryge, de dar ys gewesen tuschen den ersamen heren, hern Ludwig, dem byscope van Monstere, und syme gestichte und alle eren holperen up eyne syd und den edelen manne greven Engelbert van der Marke und allen synen holperen up andere syd, doon kund alle dengenen, de dessen kegenworden breef seen soln und horet lesen, und bekennen an dessen kegenworden breeve, dat wy der zoone, de der vorgenomden heren vrend gedegedingt hebt van beden syden, under uns eyndrechtigh wurden syn und vulborden se, als hir naagescreven steet: Thon ersten male, dat alle de man van beden syden sulen wederkomen an ere leen. Vort so magh de greve van der Marke Lunen tymmeren na alle sinem willen; daran sal ene de byscop van Monstere nicht hinderen, derwile hee levet, noch alle deghene, de dorg eme doon und laten willet, mid geestlyken noch mid werltliken saken, sunder arghelyst. Des sal de byscop van Monstere den greven sinen openen breef geven, dat dit vast und stede blyve. Vortmer sal de greve van der Marke den Daverenberg wederlaten den rechten ervenen mitten gerichte van Asceberghe half, also als de greve dat vergulden hadde. Ok solen de erven van den Daverenberg dat versekeren, dat deme stichte van Monstere nogh deme greven van der Marke nyn scade daraf gescee. Vortmer sal de byscop van Monstere brechen Renen und de Dornsburgh vertennacht na dem daghe, dat de byscoop mitten greven sin dingh heft verendet. Vortmer so sal de byscoop van Monstere geven den greven van der Marke vif dusint und fif hundert mark Sostscher penninghe, als nu genge und geve sint, vor sik und vor anderen de gevangnen. Dorvore sal hee solven an trowen sekeren mit viftich bogen mit samderhand, und hee nicht mitt siner antale aftgoghane, myd ersamen luden, edelen luden, myd ritteren, mid knapen, de gheervet sin, dat geelt tho betalne den vorgenomten greven ofte sinen rechten anerven tho den tyden, als hir nagescreven steet. Dusend mark des vorgenomden geldes up den druttenden dagh, de nu nest komen sal, dusent mark up den ersten sondagh in der vastene darna und dusent mark up Paschen, de dar nest komen sal, also bescedelyke: Were, dat de byscop des geeldes to den tyden, als vorgescreven ys, nicht enghulde, so sal hee mitten viftich borghen, de vorgenomt syn, inriden tho dem Hamme und dar lesten eynen mand mitten burgen vor dat vorgenomte geelt. Und wan de mand geleden ys, so sal de byscoop unde syne borgen thon Hamme betaln dat vorgenomte geelt myd reeden penninghen, also dat tho iewelyker tyd men dat geelt thon Hamme berede und betale. Vortmer vor de and vifuntwintich hundert mark sal deselve byscop demeselven greven und synen rechten erven setten das hus tho Portesler mitten gerichte, mid alle deme, als id de greve hadde, do id de byscop leeste van em looste.Hirto sal hee em setten dat rychte tho Olfen unde vort lude und alle gut, dat in dem kerspele van Olfen gelegen ys, dat syn ist. Ok sal hee eme setten dat richte van Werne und vort lude und allet dat guth, dat in dem kerspele van Werne gelegen is, dat syn ys. Unde sal de vorgenomte byscop demselven greven und synen rechten erven dat hus unde gerichte mitten luden und mit allen den guden, dat vorgenomt ys, lenen vor eyn ledich leen tho versatene, also bescedelyke, dat deselve byscop oft syne nakomelinge oft syn stichte datselve hus, de gerichte, lude und guth, so id hyr vorgenomt ys, moghen losen alle yar up sunte Peters dagh, de komt in der vastene, umme vifuntwintich hundert mark des vorgenomten geldes und paymentes. Ok mag de greve van der Marke an den vorgenomten hus verbowen viftych mark Sostscher penninghe na raade und orkunne der borglude, de eme oft sinen ervenden dat stichte van Monstere belegghen sal, wan see id loset. Vortmer sal de byscop de burglude van Portesler doon hulden dem greven und sinen rechten erven mid dem unterscede, als hir voreghescreven ys. Und welik borgman nicht hulden wolde, den mag de greve van den hus doon varen. Und wanne de byscop desse vorgenomten stucke verendet heft mittem greven, so solen hee und alle gevangnen an beyden syden loos und ledich syn, se sin verwiset oder unverwiset, ane deghene, de gescattet weren des nesten gudensdaghs, de nest was vor sunte Remeys dagh, und er gelt vorborghet hadden, dar se nicht vor inkomen moghen. Were over, dat de selve byscoop van Monstere desse vorgenomte stucke nicht verendede mytten greven, also hir voreghescreven ys, van dessen daghe binnen verten daghen, so sal de byscoop und anderen gevangnen alle van dessen dage up den vertenden dagh tho Altenaa weder inkomen, also als he und see gesekert hebbet und ghesworn. Vortmer so sal de greve van der Marke uns, greven Alve van den Berghe, antworden de verbundbreeve, de spreken tuschen Reynalt van Gelren und eme. Na den breven sule wy den greven van der Marke segen, dat wy eme syne ere bewaren. Vortmer umme dat gerichte van Sendenhorst sal de byscop doon heren Tyderike van Volmesteyne, dat sine edele man, syne man und syne denstmanwysent, dat recht sy. Vortmer umme den krygh, de ys tuschen den byscope van Monstere und hern Bernarde van Dodorpe und hern Bernde den Drosten, sal mallik kesen twe zooneman, de solen sceeden mid mynnen ofte myd rechte. Were, dat se des nicht kunden doon, so sal her Heydenrich de Wulf en overman syn; und tho welker partye hee velt mid rechte, dat sal vortgaan. Over en welde her Heydenrych nyn overman wesen, so solen her Korf und her Joahn Klot eynen anderen overman setten, de desolven macht hebbe, de her Heydenrich de Wulf hadde tuschen den beyden partyen. Umme dat alle desse vorgenomten stucke, de desser vorgenomten heren vrend tuschen en gedegdinget hebbet, und der wy under uns endrechtigh wurden syn, steede und vast gehalden werden vor eynen gantze zoone, so heb wy unse ingesegele tho enen orkunde und tho eynen merre stedicheyt an dessen breef gehangen, de gegeven ys na Godes gebort dusint dryhundert yar unde in den dre und twintigsten yare, des sundages na senthe Mertens dagh.

Siehe auch

• Portal:Urkunden